Tid å hausta inn - Geirr Tveitt og Olav H. Hauge - 100 år
	Rikskonsertane Konsert Vev Rikskonsertane		To fargerike hardingar rundar 100 år. Rikskonsertane markerer dobbeltjubileet med å sende tre av Noregs fremste utøvarar og ein mangfaldig konsertforestilling ut på turné. Artikkel frå Rikskonsertane Songaren Lars Klevstrand, pianisten Håvard Gimse og skodespelaren Hildegun Riise er blant våre fremste utøvarar på sine felt. Gjennom fleire år har dei også vore formidlarar av Olav
			H. Hauge og Geirr Tveitt. Det er difor ei glede for Rikskonsertane å kunne presentere desse tre i lag for fyrste gong. I år feirar me at diktaren Olav H. Hauge og komponisten Geirr Tveitt ville ha fylt 100 år. Begge kunstnarane budde i Hardanger, og markerte seg så vel nasjonalt som internasjonalt med kvart sitt særmerkte uttrykk. Sterkt forankra i den lokale tradisjonen var dei på same tid språksterke kosmopolittar, og produksjonen deira syner stor breidd. Såleis er det òg duka for ein mangfaldig konsertforestilling. Musikken spenner frå europeiske, Bach-inspirerte klaverstykke til rotekte hardingtonar, frå den varaste klaverpoesi til primitiv villskap, for ikkje å gløyme Tveitt sin mangslungne song- og viseskatt. Alt dette vert tett samanvevd med Hauge sine underfundige og innsiktsfulle dikt, aforismar og dagboknotatar, nokre av dikta i tonesetjing av Geirr Tveitt og Per Indrehus. Medverkande: Lars Klevstrand- song, Håvard Gimse – piano og Hildegun Riise- opplesing Eit lite utval av artistane sitt tidlegare arbeid med kunstnarane Hauge og Tveitt: Håvard Gimse er ein av dei fremste pianistane i Skandinavia, og har i ei årrekkje formidla Geirr Tveitt sin musikk. Mellom anna har han gjeve ut Tveitt sine samla verk på plate. I februar var Gimse solist då Oslo -Filharmonien framførte Klaverkonsert nr. 5 av Tveitt.  Hildegun Riise har tidlegare lese dikt og dagboknotat av Hauge i førestillinga Under Stjernone, som mellom anna vart framsynt i samband med Festspillene i Bergen 2008. Riise hadde regien på Festframsyninga for Olav H. Hauge og Geirr Tveitt under Musikkfestivalen Hardingtonar i sumar.
			Biletet: Berit Opheim, Håvard Gimse og Hildegun Riise. Foto: Anders Bergersen / Rikskonsertane